Fréttanetið



Matur & drykkir

Vantar ykkur geggjaðan EFTIRRÉTT? Þá þurfið þið ekki að leita lengra – UPPSKRIFT

Á bökunarblogginu Blaka er að finna alveg einstaklega girnilega uppskrift að eftirrétti. Ekki skemmir fyrir að eftirrétturinn er líka mjög einfaldur.

Lilja Katrín heldur úti blogginu og sparar ekki lýsingarorðin um réttinn.

“Þetta er sem sagt í einu orði tryllt. Brjálað. Ruglað. Og fyrst og fremst: Gott!”

Ruglaður eftirréttur

Hráefni – búðingur:

1 bolli hrísgrjón

3 1/2 bolli nýmjólk

1 vanillustöng

2 Nesbú-eggjarauður

1/2 bolli rjómi

1/4 bolli sykur

smá salt

100g grófsaxað hvítt súkkulaði

Hráefni – nammimöndlur:

1/2 bolli möndluflögur

1 1/2 msk sykur

Hráefni – nammibananar:

1 banani

2 msk sykur

Hráefni – karamellusósa:

1/2 bolli púðursykur

1/2 bolli rjómi

smá salt

2 msk smjör

IMG_3847

Aðferð – búðingur:

Skafið úr vanillustönginni og setjið kornin og sjálfa stöngina í pott með mjólk og hrísgrjónum. Hitið yfir meðalháum hita líkt og um grjónagraut væri að ræða og leyfið að malla í 20 til 25 mínútur og hrærið við og við í grautnum.

Blandið saman eggjarauðum, rjóma, 1/4 bolla af sykri og salti. Bætið því næst hvíta súkkulaðinu út í.

Þegar grjónagrauturinn er tilbúinn er eggjarauðublöndunni bætt út í og suðan látin koma upp. Takið pottinn af hellunni þegar allt súkkulaðið er bráðnað. Takið vanillustöngina úr og hendið henni. Setjið í skálar og skreytið með möndlum, bönunum og karamellusósu.

Nammimöndlur:

Setjið sykur og möndlur á pönnu og hitið yfir meðalháum hita. Hrærið í þessu þegar sykurinn byrjar að bráðna þannig að hann karamelliseri möndlurnar vel. Setjið á bökunarpappír og leyfið möndlunum aðeins að jafna sig.

Nammibananar:

Skerið banana í sneiðar og veltið upp úr sykrinum. Takið sömu pönnu og möndlurnar voru hitaðar á og setjið bananasneiðarnar á hana. Hitið yfir meðalháum hita í um 2 mínútur á hvorri hlið. Setjið á bökunarpappír og leyfið að jafna sig.

Karamellusósa:

Setjið öll hráefni á sömu pönnu og þið eruð búin að vera að nota og bræðið saman yfir meðalháum hita í um 2 mínútur, eða þar til blandan er fallega brún og farin að þykkna.